पुणे : पुणे रेल्वे स्टेशनला थोरले बाजीराव पेशवे यांचे नाव देण्याची मागणी भाजप खासदार मेधा कुलकर्णी यांनी रेल्वेच्या विभागीय बैठकीत केल्यानंतर त्यांना सोशल मीडियावर ट्रोल करण्यात आले. यावरून शहरात राजकीय वाद निर्माण झाला आहे. विविध संघटनांनी पुणे रेल्वे स्टेशनसाठी महात्मा ज्योतिबा फुले आणि राजमाता जिजाऊ यांची नावे सुचवली, तर काहींनी कुलकर्णी यांच्या मागणीला विरोध दर्शवत आंदोलन केले. शहरात ‘बुधवार पेठेचे नाव मस्तानी पेठ करा’ अशा आशयाचे खोचक बॅनर झळकले. यावर प्रतिक्रिया देताना मेधा कुलकर्णी भावूक झाल्या आणि त्यांनी टीकाकारांनी वापरलेल्या अमर्यादित भाषेबद्दल नाराजी व्यक्त केली.
शहरात पोस्टर वॉर आणि वाद
पुणे रेल्वे स्टेशनच्या नामकरणावरून निर्माण झालेल्या वादात अनेकांनी आपली मते मांडली. इतिहास अभ्यासक श्रीमंत कोकाटे यांनी स्टेशनला राजमाता जिजाऊ यांचे नाव देण्याची मागणी केली. दरम्यान, शहरात ‘पोस्टर वॉर’ सुरू झाले. शिवसेना (उद्धव बाळासाहेब ठाकरे) गटाने लावलेल्या बॅनरमध्ये ‘कोथरूडच्या बाई, नामांतराची खुमखुमी असेल तर बुधवार पेठेचे नाव मस्तानी पेठ करा’ असा खोचक मजकूर होता. या बॅनरवर पहिल्यांदाच प्रतिक्रिया देताना मेधा कुलकर्णी यांनी तीव्र संताप व्यक्त केला आणि अशा टीकेला मर्यादा असावी, असे सांगितले.
मेधा कुलकर्णी म्हणाल्या, “पुणे रेल्वे स्टेशनला सध्या कोणतेही नाव नाही, त्यामुळे आपण सर्वजण नाव सुचवू शकतो. बाजीराव पेशवे हे भूषणावह नाव आहे, असे माझे मत आहे. कोणीही आपले मत मांडू शकतो, टीका होऊ शकते. पण बुधवार पेठेला मस्तानी पेठ नाव द्या, असे म्हणणे चुकीचे आहे. आम्ही मागणी केली आहे, पण निर्णय वेगळे लोक घेतील. टीकेला मर्यादा हवी.” या बॅनरमुळे आपल्याला वैयक्तिकरित्या दुखावले गेले आहे”, असे सांगताना त्या भावूक झाल्या आणि त्यांना अश्रू अनावर झाल्याचे पहायला मिळाले आहे.
महिलांवरील टीकेवर संताप
मेधा कुलकर्णी यांनी सांगितले की, त्यांनी जगभरात साडी नेसून मराठी संस्कृतीचे प्रतिनिधित्व केले आहे, पण अशा खोचक आणि अश्लील बॅनरमुळे त्यांना वाईट वाटले. त्या म्हणाल्या, “टीका करायची असेल तर मर्यादेत करा. अशा लोकांना शिक्षा झाली पाहिजे. महिला म्हणून मी हे बोलले पाहिजे.” पुणे रेल्वे स्टेशनच्या नामकरणाबाबत पुढील प्रक्रिया लवकरच होईल, असेही त्यांनी नमूद केले. या वादामुळे पुण्यातील राजकीय वातावरण तापले असून, नामकरणाचा अंतिम निर्णय काय होतो, याकडे सर्वांचे लक्ष लागले आहे.
महत्वाच्या बातम्या
-विवाहित महिलेची इन्स्टाग्रामवर तरुणाशी ओळख, आठवड्यात प्रेम, अन् त्याच्या एका मागणीने केला घात
-स्वारगेट अत्याचार प्रकरण: आरोपी दत्ताच्या जामीन मिळण्याची शक्यता, पीडितेची न्यायालयात भीती
-‘ठाकरे इज द ब्रँड’ ट्वीट करत राऊतांनी भाजपला डिवचलं, थेट अमित शहा, फडणवीसांना केलं टॅग
-अमोल मिटकरींच्या ‘त्या’ भावनेला सुनेत्रा पवारांनी दिलं उत्तर; म्हणाल्या, ‘माऊली नक्कीच…’
-मॅट्रिमोनियल साइटद्वारे ३.६० कोटींची फसवणूक; ऑस्ट्रेलियन नागरिकाला अटक
