पुणे : पुणे महापालिकेत ११९ जागा जिंकून भाजपने स्पष्ट बहुमत मिळवले असतानाच, आता स्वीकृत नगरसेवक पदांच्या वाटपावरून मोठी घमासान सुरू झाली आहे. महापालिका अधिनियमातील तरतुदींनुसार स्वीकृत सदस्यांची नावे राजकीय पक्षांच्या संख्याबळानुसार गटनेत्यांशी चर्चा करून निश्चित करावीत, असा स्पष्ट नियम आहे. मात्र, हा नियम डावलून तब्बल ७०० ते ८०० इच्छुकांनी थेट महापालिका आयुक्तांकडे अर्ज दाखल केले आहेत. हे प्रकार पुणे महापालिकेत पहिल्यांदाच घडले असून, नियमावलीचे उल्लंघन असल्याने हे अर्ज बाद होण्याची शक्यता अधिक आहे.
नव्या नियमानुसार महापालिकेत १० स्वीकृत नगरसेवक नियुक्त केले जाणार आहेत. यामध्ये भाजपच्या वाट्याला ७, राष्ट्रवादी काँग्रेसला २ आणि काँग्रेसला १ पद मिळणार आहे. महापालिका आयुक्त नवल किशोर राम यांनी सर्व पक्षांच्या गटनेत्यांना पत्र देऊन स्वीकृत नगरसेवक पदासाठी नावे शिफारस करण्यास सांगितले आहे. ही नावे सोमवारी (९ मार्च) सकाळी ११ ते दुपारी २ या वेळेत आयुक्तांकडे सादर करावी लागणार आहेत. त्यानंतर मार्च महिन्याच्या पहिल्या सर्वसाधारण सभेत या नियुक्त्यांना अंतिम स्वरूप मिळेल.
निवडणुकीपूर्वी तिकीट मिळवण्यासाठी प्रचंड प्रयत्न केलेल्या अनेक कार्यकर्त्यांना तिकीट न मिळाल्याने नाराजी आहे. तिकीट नाकारले गेल्याने अनेकांना अन्याय झाल्याची भावना निर्माण झाली. त्यामुळे आता स्वीकृत नगरसेवक पद मिळावे म्हणून पक्ष नेत्यांकडे जोरदार लॉबिंग सुरू आहे. काहींना पक्षाने आश्वासन दिले असून, ते पद मिळवण्यासाठी थेट आयुक्तांकडे अर्ज दाखल करून दबाव आणण्याचा प्रयत्न करीत आहेत. या सर्व अर्जांमुळे नियमावलीचे उल्लंघन झाले असून, हे अर्ज बाद होण्याची शक्यता अधिक आहे.
या प्रकरणामुळे महापालिकेत गोंधळ निर्माण होण्याची शक्यता आहे. महापालिका अधिनियम, १९४९ मधील कलम ५ (२) नुसार स्वीकृत सदस्यांची निवड प्रक्रिया काय असावी, याचे स्पष्ट नियम आहेत. त्यानुसार आयुक्तांनी गटनेत्यांशी चर्चा करून नावे निश्चित करावीत आणि सभागृहासमोर ठेवावीत. सभागृहाला नाव फेटाळण्याचा अधिकार असतो. मात्र, थेट अर्ज सादर केल्याने आणि ते स्वीकारले गेल्याने नियमांचे उल्लंघन झाले असून, यामुळे न्यायालयीन वाद उद्भवण्याची शक्यताही वर्तवली जात आहे.
महत्वाच्या बातम्या-
-“तू खूप सुंदर दिसतेस” म्हणत हात पकडला अन्…; शिवाजीनगरमध्ये पोर्टर डिलिव्हरी बॉयकडून तरुणीचा विनयभंग
-पुणे पालिका अधिकाऱ्याच्या मुलाचा कारनामा, कॉलेजसमोरच पँट खाली करायचा अन्…
-आता पीएमटी प्रमाणे पुणे मेट्रोतही असणार महिलांसाठी राखीव जागा! महिला दिनापासून लागू होणार निर्णय
