पुणे : एप्रिल २०२५ पासून पुणे विमानतळ परिसरात फिरणारा रहस्यमयी बिबट्या अखेर ७ महिन्यांच्या अथक प्रयत्नानंतर सुरक्षित पकडला गेला. वन विभाग, RESQ चॅरिटेबल ट्रस्ट, भारतीय हवाई दल आणि विमानतळ प्राधिकरण यांच्या संयुक्त पथकाने हे जिकिरीचे ऑपरेशन यशस्वी केले. २८ एप्रिलला पहिल्यांदा सीसीटीव्हीमध्ये कैद झालेला हा बिबट्या विमानतळाच्या बोगदे, दाट झाडी आणि लष्करी क्षेत्रात लपत-छपत फिरत होता.
विमानतळाचा विस्तीर्ण आणि संवेदनशील परिसर असल्याने पकडणे अत्यंत आव्हानात्मक होते. कॅमेरा ट्रॅप, लाईव्ह कॅमेरे आणि अनेक पिंजरे लावूनही बिबट्या काही केल्या पिंजऱ्यात शिरला नव्हता. अखेर विशेष रणनीती आणि सतत निरीक्षणानंतर त्याला पकडण्यात यश आले. बिबट्याला कोणतीही इजा न करता सुखरूप पकडले गेले.
पकडल्यानंतर त्याची आरोग्य तपासणी करून बावधन येथील RESQ ट्रान्झिट ट्रीटमेंट सेंटरमध्ये हलवण्यात आले आहे. सध्या तो पूर्णपणे सुरक्षित आणि स्थिर असल्याची माहिती वन विभागाने दिली. पुढील काही दिवस निरीक्षणात ठेवल्यानंतर त्याला नैसर्गिक अधिवासात सोडले जाईल. पुणे विमानतळावरून बिबट्याचा धोका टळल्याने प्रवासी आणि कर्मचाऱ्यांनी सुटकेचा नि:श्वास सोडला आहे.
महत्वाच्या बातम्या-
-१०८ रुग्णवाहिकेची राज्यातील १ कोटी १४ लाख नागरिकांना मोफत आरोग्यसेवा
-महापालिका निवडणुकीबाबत मोठी बातमी, पुणे पालिका निवडणूक कधी?
-भाजपचा भ्रष्टाचार उघड करणारी ‘फाइल’ उद्धव ठाकरेंकडे; पुण्यात ठाकरे सेनेची रणनीती
