पुणे : कल्याणीनगर पोर्शे कार अपघात प्रकरणात आरोपी अल्पवयीन मुलाचे वडील आणि बांधकाम व्यावसायिक विशाल अग्रवाल यांना सर्वोच्च न्यायालयाने जामीन मंजूर केला आहे. गेल्या २२ महिन्यांपासून येरवडा केंद्रीय कारागृहात न्यायालयीन कोठडीत असलेल्या अग्रवाल यांना आता दिलासा मिळाला आहे. १९ मे २०२४ रोजी रात्री घडलेल्या या भीषण अपघातात अल्पवयीन मुलाने चालवलेल्या पोर्शे कारने दुचाकीला धडक दिल्याने दोन तरुण-तरुणींचा जागीच मृत्यू झाला होता. या प्रकरणाने देशभरात मोठी खळबळ उडाली होती.
अपघातानंतर अल्पवयीन आरोपीचे रक्ताचे नमुने बदलण्याचा आरोप ससून रुग्णालयातील तत्कालीन वैद्यकीय अधीक्षक डॉ. अजय तावरे यांच्यावर ठेवण्यात आला होता. त्यांना यापूर्वीच सर्वोच्च न्यायालयाने जामीन मंजूर केला होता. विशाल अग्रवाल यांच्यावर मद्यप्राशनासाठी मदत करणे, पुरावे लपवणे आणि इतर आरोप ठेवून २१ मे २०२४ रोजी छत्रपती संभाजीनगरमधून अटक करण्यात आली होती. तेव्हापासून ते तुरुंगात होते आणि अनेक न्यायालयांत जामिनासाठी अर्ज दाखल केले होते.
या प्रकरणात अल्पवयीन आरोपीविरुद्ध तसेच इतर संबंधितांवरही कायदेशीर प्रक्रिया सुरू आहे. अपघातानंतर पोलिसांनी व्यापक तपास केला असून, मद्यप्राशन, पुरावे नष्ट करणे आणि इतर गंभीर आरोपांखाली कारवाई झाली होती. सर्वोच्च न्यायालयाने अग्रवाल यांच्या जामीन याचिकेवर सुनावणी करून आता जामीन मंजूर केला आहे. या निर्णयामुळे प्रकरण पुन्हा एकदा चर्चेत आले असून, न्यायालयीन प्रक्रियेकडे सर्वांचे लक्ष लागले आहे.
या अपघाताने पुणे शहरातून तरुणांच्या सुरक्षिततेचा आणि मद्यपान करून वाहन चालवण्याच्या धोक्याचा प्रश्न पुन्हा ऐरणीवर आला होता. अग्रवाल यांच्या जामीनामुळे आता प्रकरणातील पुढील सुनावणी आणि निकालाकडे लक्ष लागले आहे. पोलिसांनी सांगितले की, प्रकरणाचा तपास पूर्ण होऊन आरोपपत्र दाखल करण्याची प्रक्रिया सुरू आहे.
महत्वाच्या बातम्या-
-दुसऱ्या धर्मात लग्न, लग्नानंतर छळ सहन केला अन् आता हिंदू धर्मात ‘अद्या सुर्वे’ परतली
