पुणे : पाषाण-औंध परिसरातील वाहतूक कोंडीचा प्रश्न मार्गी लावण्यासाठी महत्त्वपूर्ण घडामोड झाली आहे. राजभवन रोड (सद्य: लोकभवन रोड) या अत्यंत महत्त्वाच्या व्हीआयपी मार्गाच्या रुंदीकरणाची नगरसेवक सनी निम्हण यांनी मागणी केली. त्यांच्या या मागणीला प्रशासनाकडून सकारात्मक प्रतिसाद मिळाला आहे. आज सनी निम्हण यांनी अतिरिक्त आयुक्त दिवटे यांची भेट घेऊन या विषयावर सविस्तर चर्चा केली. या वेळी रस्त्याच्या रुंदीकरणास अडथळा ठरत असलेल्या पोलीस विभागाच्या तीन इमारतींचा मुद्दा ठळकपणे मांडण्यात आला.
सनी निम्हण यांच्या मागणीनंतर अतिरिक्त आयुक्तांनी तातडीने दखल घेत, येणाऱ्या काही महिन्यांत पोलीस विभागाच्या सर्व संबंधित इमारतींचे स्थलांतर पूर्ण करून रस्त्याचे रुंदीकरण करण्यात येईल, असे ठाम आश्वासन दिले. राजभवन (लोकभवन) रस्ता हा पुणे महानगरपालिका आणि पिंपरी-चिंचवड महानगरपालिका यांना जोडणारा प्रमुख मार्ग असून, या मार्गावरून मोठ्या प्रमाणात वाहतूक तसेच व्हीआयपींची ये-जा होत असते. त्यामुळे या रस्त्याच्या रुंदीकरणामुळे औंध-पाषाण परिसरातील वाहतूक कोंडी मोठ्या प्रमाणात कमी होणार असून नागरिकांना दिलासा मिळणार आहे.
तसेच, ब्रेमेन चौक ते औंध राजीव गांधी पूल दरम्यान प्रस्तावित उड्डाणपूल प्रकल्पालाही यामुळे गती मिळणार असून, भविष्यात संपूर्ण परिसरातील वाहतूक व्यवस्थेत लक्षणीय सुधारणा अपेक्षित आहे. नगरसेवक सनी विनायक निम्हण यांनी नागरिकांच्या हितासाठी प्रशासनाने सकारात्मक भूमिका घेतल्याबद्दल समाधान व्यक्त केले. काम वेळेत पूर्ण व्हावे यासाठी सातत्याने पाठपुरावा सुरू राहील, असेही त्यांनी सांगितले.
महत्वाच्या बातम्या-
-अश्लील फोटो व्हायरल करून २० लाखांची खंडणी मागणारा नराधम अटकेत; वारजे माळवाडी पोलिसांची कारवाई
-दिल्ली मॉडेल पुण्यात राबवण्याचा भाजपचा आग्रह, शिंदेंच्या शिवसेनेचा मात्र विरोध; महायुतीत ठिणगी
-औंध-डेक्कन बससेवा पुन्हा सुरू! नगरसेवक सनी निम्हणांच्या पाठपुराव्याने नागरिकांना मोठा दिलासा
