पुणे : विधानसभा निवडणुकीत महाविकास आघाडीला मिळालेल्या अपयशानंतरही आघाडीची घडी बसत नसल्याचे चित्र दिसत आहे. अशातच काही महिन्यात येऊ घातलेल्या स्थानिक स्वराज्य संस्था निवडणुकीच्या पार्श्वभूमीवर आघाडीच्या नेत्यांनी मित्रपक्षांतील नेत्यांबाबत वक्तव्य करणं तसेच नाराजी बोलून दाखवत असल्याने आघाडीतील धूसफूस चव्हाट्यावर आली आहे. आघाडीच्या अनेक नेत्यांनी स्वबळावर लढणार असल्याचा नारा दिला आहे. अशातच आता शिवसेना ठाकरे गटाच्या उपनेत्या सुषमा अंधारे यांनी धक्कादायक वक्तव्य केलं आहे.
‘शिवसेना उद्धव बाळासाहेब ठाकरे पक्षाचे बारामती लोकसभा मतदारसंघातील कार्यकर्त्यांनी खासदार सुप्रिया सुळे यांच्याबाबत नाराजी व्यक्त केली’, अशी माहिती सुषमा अंधारे यांनी माध्यमांना दिली आहे. यानिमित्ताने आता महाविकास आघाडीतील धुसफूस पुन्हा एकदा चव्हाट्यावर आली आहे. दुसरीकडे सुप्रिया सुळे यांनी सुषमा अंधारे यांच्या वक्तव्यावर सारवासारवची भूमिका घेत वादावर पडदा टाकण्याचा प्रयत्न केल्याचंही पहायला मिळालं आहे.
नेमकं काय म्हणाल्या सुषमा अंधारे?
“शिवसेना उद्धव बाळासाहेब ठाकरे पक्षाच्या इंदापूर, दौंड, पुरंदर आणि बारामतीच्या कार्यकर्त्यांनी कालच्या बैठकीत नाराजी व्यक्त केली. पण ती नाराजी सुप्रिया ताई यांच्याबद्दलची होती. त्यांचं म्हणणं होतं की, निवडणूक काळात आम्ही सुप्रिया ताईंसाठी छातीचा कोट करुन काम केलं. मात्र सुप्रिया ताई यांच्याकडून आम्हाला जसा प्रतिसाद हवा तसा मिळत नाही. त्यामुळे आम्ही थोडेसे दुखावले गेले आहोत. त्यावर संजय राऊतांनी कार्यकर्त्यांची समजूत काढली. मी दिल्लीत संसदेच्या अधिवेशनावेळी सुप्रिया सुळे यांना भेटेन तेव्हा तुमच्या भावना सांगेन. गरज पडल्यास इंदापूर, दौंड, पुरंदर, बारामतीच्या कार्यकर्त्यांची सुप्रिया सुळे यांच्यासोबत बैठक घेऊन नाराजी दूर केली जाईल”, अशी ग्वाही राऊतांनी कार्यकर्त्यांना दिली आहे”, असे सुषमा अंधारे म्हणाल्या आहेत.
अंधारेच्या वक्तव्यावर सुप्रिया सुळेंची प्रतिक्रिया
“आमच्याकडून काहीही कमतरता झाली असेल तर मी स्वत:हून त्याची नैतिकतेने जबाबदारी घेईन. मी ३० तारखेला मतदारसंघाच्या दौऱ्यावर असणार आहे. मी दौंड, इंदापूर आणि बारामतीच्या ठाकरे गटाच्या जिल्हाध्यक्षांना फोन करुन त्यांच्या मनातील कटुता दूर करण्याचा प्रयत्न करेन. मी दर १५ दिवसांनी मतदारसंघात असते. त्यावेळी मी महाविकास आघाडीची बैठक घेते. एखादा कार्यकर्ता दुखावला गेला असेल तर त्याची नाराजी दूर करणं ही माझी नैतिक जबाबदारी आहे. मी तातडीने आजच्या आज शिवसैनिकांची नाराजी दूर होईल, यासाठी प्रयत्नांची पराकष्ठा करणार आहे. महाविकास आघाडीत कुणाचीही तक्रार येणार नाही, याची स्थानिक लोकप्रतिनिधी म्हणून नैतिक जबाबदारी घेतली पाहिजे. ती जबाबदारी मी घेत आहे”, असे सुप्रिया सुळे सुषमा अंधारेच्या वक्तव्यावर म्हणाल्या आहेत.
महत्वाच्या बातम्या-
-महापालिका निवडणुकीवर आजच फैसला? सुप्रीम कोर्टात काय घडतंय…
-लहु बालवडकरांचा आरोग्य उपक्रम प्रेरणादायी; ‘अटल सेवा महाआरोग्य शिबिरा’ने समाजाला नवी दिशा
-GBS Disease: “त्याच पाण्यामुळे ‘जीबीएस’ होतोय”; आरोग्यमंत्र्यांनी दिली कबुली
