पुणे : पुणे महापालिका निवडणुकीत प्रचंड बहुमत मिळवलेल्या भाजपसह इतर पक्षांमध्ये आता स्वीकृत नगरसेवक पदांसाठी जोरदार चढाओढ सुरू झाली आहे. महापौर, उपमहापौर, सभागृह नेते आणि स्थायी समिती अध्यक्षांसह विविध समित्यांच्या पदांची निवड प्रक्रिया जवळपास पूर्ण झाल्यानंतर आता स्वीकृत नगरसेवक पदांकडे सर्वांचे लक्ष लागले आहे. या पदांसाठी पक्षांतर्गत आणि बाहेरून अनेक कार्यकर्ते फिल्डिंग लावून बसले असून, नावे मिळावीत म्हणून जोरदार प्रयत्न सुरू आहेत.
महापालिका आयुक्त नवल किशोर राम यांनी सर्व पक्षांच्या गटनेत्यांना स्वीकृत नगरसेवक पदासाठी नावे शिफारस करण्याबाबत पत्र दिले आहे. त्यानुसार भाजपकडून ७, राष्ट्रवादी काँग्रेसकडून २ आणि काँग्रेसकडून १ असे एकूण १० स्वीकृत नगरसेवक निवडले जाणार आहेत. ही नावे ९ मार्च रोजी सकाळी ११ ते दुपारी २ या वेळेत आयुक्तांकडे सादर करावी लागणार असून, मार्च महिन्याच्या पहिल्या सर्वसाधारण सभेत त्यावर शिक्कामोर्तब होईल.
निवडणुकीपूर्वी सर्वच पक्षांच्या कार्यकर्त्यांनी तिकीट मिळवण्यासाठी मोठे प्रयत्न केले होते. मात्र, तिकीट वाटपात अनेक जुन्या आणि निष्ठावंत कार्यकर्त्यांवर अन्याय झाल्याची भावना निर्माण झाली. काहींना एबी फॉर्म देऊनही उमेदवारी अचानक काढून घेण्यात आली, तर काहींची उमेदवारी फक्त आमदार-मंत्र्यांच्या नातेवाईक असल्याने नाकारण्यात आली. अनेक ठिकाणी बाहेरून आणलेल्या उमेदवारांमुळे स्थानिक कार्यकर्त्यांचा पत्ता कट झाला.
या नाराज कार्यकर्त्यांची समजूत काढण्यासाठी पक्ष नेत्यांकडून वेगवेगळी आश्वासने देण्यात आली. त्यापैकी अनेकांना स्वीकृत नगरसेवक पद देण्याचे वचन देण्यात आले आहे. त्यामुळे हे कार्यकर्ते आता आपल्या पदरात हे पद पडेल अशी आस लावून बसले आहेत. पक्षांतर्गत ही चढाओढ तीव्र असून, नावे निश्चित होईपर्यंत राजकीय वर्तुळात चर्चा रंगली आहे.
महापालिकेत भाजपची पूर्ण बहुमताची सत्ता असल्याने स्वीकृत नगरसेवक पदांची निवड पक्षाच्या अंतर्गत समीकरणांवर अवलंबून राहणार आहे. या पदांमुळे पक्षाला महापालिकेत अतिरिक्त ताकद मिळणार असून, विकासकामांमध्ये सहभागी होण्याची संधी मिळणार आहे. ९ मार्च रोजी नावे सादर झाल्यानंतर मार्चच्या पहिल्या सभेत या नियुक्त्यांना अंतिम स्वरूप मिळेल.
महत्वाच्या बातम्या-
-‘आयुक्त साहेब, माझ्या मानहानीचा खुलासा करा’ राज्यमंत्री माधुरी मिसाळ आक्रमक, सुनावले खडेबोल
-औंध-बोपोडी प्रभागातील महत्त्वाच्या प्रकल्पांना आयुक्तांची भेट; कामे तातडीने पूर्ण करण्याचे निर्देश
-पुण्यातील ‘त्या’ स्पा सेंटरवर छापा: भीतीने मॅनेजर आणि महिलेची खिडकीतून उडी मारली अन्…
