पुणे : महापालिकेच्या १५ प्रभाग समित्यांच्या अध्यक्षपदासाठी शुक्रवारी अर्ज दाखल करण्यात आले. यापैकी १३ समित्यांची निवडणूक बिनविरोध होणार असून, फक्त दोन प्रभाग समित्यांसाठी निवडणूक होणार आहे. १३ पैकी १२ समित्यांचे अध्यक्षपद भाजपला मिळणार असून, एका समितीवर काँग्रेसचा अध्यक्ष असणार आहे.
प्रभाग समित्यांच्या रचनेत हस्तक्षेप करून भाजपच्या पदाधिकाऱ्यांनी मनमानी केल्याबद्दल उपमुख्यमंत्री सुनेत्रा पवार यांनी मुख्यमंत्री देवेंद्र फडणवीस यांच्याकडे तक्रार केली होती. त्यानंतर भाजपने राष्ट्रवादीला ढोलेपाटील रोड क्षेत्रीय कार्यालयाच्या प्रभाग समितीचे अध्यक्षपद दिले आहे. ढोले पाटील रोड आणि येरवडा-वडगावशेरी क्षेत्रीय कार्यालयाच्या अध्यक्षपदासाठी निवडणूक होणार आहे.
महापालिका निवडणुकीनंतर प्रशासनाने १५ क्षेत्रीय कार्यालयांची पुनर्रचना केली. नव्या रचनेत भाजपचे वर्चस्व निर्माण होणार होते, तर राष्ट्रवादीला एकही प्रभाग समिती मिळणार नव्हती. सुनेत्रा पवार यांच्या तक्रारीनंतर नगरविकास विभागाने ७ एप्रिल रोजी अहवाल मागितला होता, मात्र अहवाल अद्याप आलेला नाही.
ढोले पाटील रोड प्रभाग समितीसाठी राष्ट्रवादी काँग्रेस (अजित पवार) पक्षाच्या सुरेखा कवडे आणि काँग्रेसच्या वैशाली भालेराव यांनी उमेदवारी अर्ज दाखल केले आहेत. येरवडा-वडगावशेरी प्रभाग समितीसाठी भाजपच्या कविता गलांडे आणि काँग्रेसच्या विशाल मलके यांच्यात लढत होणार आहे. ही निवडणूक येत्या २१ एप्रिल रोजी सकाळी ११ वाजता होणार असून, पीठासीन अधिकारी म्हणून अतिरिक्त जिल्हाधिकारी सतीश राऊत यांची नियुक्ती करण्यात आली आहे. या निवडणुकीकडे राजकीय वर्तुळात विशेष लक्ष लागले आहे.
महत्वाच्या बातम्या-
-पुणे विमानतळाची धावपट्टी तात्पुरती बंद! हवाई दलाच्या विमानाचा अपघात
-आरएमसी कारवाई अचानक रद्द! आमदारांच्या दबावापुढे महापालिका झुकली?
-पुण्यात उष्णतेचा तडाखा! ४२ अंशांवर पोहोचले तापमान, पुढील ४ दिवस सावध राहा
