पुणे : राज्यात उष्णतेची लाट तीव्र झाली असून पुणे शहरातही तापमान ४० ते ४१ अंशांवर स्थिर आहे. लोहगाव येथे काल सलग दुसऱ्या दिवशी तापमान ४२ अंशांवर पोहोचले. आजही उष्णता कायम राहण्याची शक्यता आहे. मात्र, उद्या (१८ एप्रिल) आणि परवा (१९ एप्रिल) पुणेकरांना काही प्रमाणात दिलासा मिळण्याची शक्यता आहे. या दोन दिवसांत पुणे शहर व जिल्ह्यात तुरळक पावसाची शक्यता हवामान विभागाने वर्तवली आहे.
हवामान विभागाने राज्यात पुढील काही दिवस उष्णतेची तीव्र लाट येण्याचा इशारा दिला आहे. मध्य महाराष्ट्रात १८ एप्रिलपर्यंत, मराठवाड्यात १६ ते १८ एप्रिलदरम्यान, विदर्भात १५ ते १९ एप्रिलदरम्यान आणि कोकणात आज (१७ एप्रिल) उष्ण व दमट हवामान राहण्याची शक्यता आहे. तापमान लक्षणीय वाढण्याची शक्यता असल्याने नागरिकांनी खबरदारी घ्यावी, असे राज्य आपत्कालीन कार्य केंद्राने आवाहन केले आहे.
उष्णतेपासून बचावासाठी काळजी घ्या:
भरपूर पाणी आणि ओआरएस घ्या
सैल, हलके आणि सुती कपडे वापरा
दुपारी १२ ते ४ दरम्यान उन्हात जाणे टाळा
टोपी, छत्री किंवा गॉगलचा वापर करा
लहान मुले आणि ज्येष्ठ नागरिकांची विशेष काळजी घ्या
पावसाची शक्यता:
मध्य महाराष्ट्र आणि मराठवाड्यात १८ ते २१ एप्रिलदरम्यान हलक्या ते मध्यम पावसासह मेघगर्जना आणि विजांचा कडकडाट होण्याची शक्यता आहे. १९ ते २२ एप्रिलदरम्यान तापमानात २ ते ३ अंशांनी घट होण्याचा अंदाज आहे.
महत्वाच्या बातम्या-
-पुण्यात अनधिकृत होर्डिंगवर चालणार हातोडा, पण किती होर्डिंग अनधिकृत? महापालिकेकडे आकडाच नाही
-शेतकऱ्यांसाठी दिलासादायक निर्णय! ‘हवेली सभापतींचा ‘बळीराजा’ मॉडेल राज्यभर राबविणार’
-पुण्यावर पाणीकपातीची टांगती तलवार; खासदार, मंत्री, आमदार कुणीच बोलत नाही, आश्वासनाचं काय?
-अल्प विस्तार, मोठा दिलासा; पीएमपीएमएल बससेवा थेट खडकी जंक्शनपर्यंत
