माहेरची साडी अन् आठवणींची ऊब: वृद्धाश्रमातील आजीबाईंना मधुरा गेठेंचा आपुलकीचा स्पर्श!

मुंबई : नववर्षाच्या स्वागताच्या जल्लोषात ‘थर्टी फर्स्ट’चा गरमागरम माहोल असताना नवी मुंबईतील एका वृद्धाश्रमात मात्र वेगळाच माहेरचा सोहळा रंगला. आरबीजी फाउंडेशनच्या अध्यक्ष मधुरा गेठे यांनी वृद्धाश्रमातील साऱ्या आजीबाईंना ‘माहेरची साडी’ भेट देऊन त्यांना काही तासांसाठी खऱ्या अर्थाने माहेरवाशिणी बनवले. प्रत्येक आजीबाईंच्या डोळ्यात उत्सुकता आणि प्रतीक्षा होती. कोणती साडी मिळेल, कोण आणेल? हा प्रश्न संपला तेव्हा डोळ्यांच्या कडा पाणावल्या, पण मधुरा गेठेंच्या आपुलकीने चेहरे हसले.

मधुरा गेठे यांनी प्रत्येक आजीबाईला हव्या त्या रंगाची आणि डिझाइनची दोन-दोन साड्या निवडायला मुभा दिली. बुधवारी सकाळी साऱ्या आजीबाई छान साड्या नेसून तयार झाल्या होत्या. प्रत्येकीची जीवनकहाणी निराळी, दुःख वेगळे, पण या मायेच्या स्पर्शाने त्या काही तास माहेरच्या आठवणींत रमल्या. कौतुकाचे हसू आणि आशीर्वादांचे धन त्यांनी मधुरा गेठेंना दिले.

हा सोहळा फक्त साड्यांचा नव्हता, तर माहेरच्या ऊबीचा होता. मधुरा गेठे म्हणाल्या, “आयुष्याच्या प्रत्येक वळणावर महिलेला माहेरची ओढ असते. उतारवयातही ती आठवणींनी व्याकूळ करते. आजीबाईंच्या चेहऱ्यावर माहेरचा आनंद यावा, हा कौटुंबिक भावनेतूनच हा उपक्रम राबवला. त्यांना काही तास का होईना माहेरी आल्यासारखे वाटावे, हाच उद्देश होता.”

केक कापून सरत्या वर्षाला निरोप आणि नववर्षाचे स्वागत करताना आजीबाईंच्या चेहऱ्यावरील समाधान पाहून मधुरा गेठेंना खरे यश मिळाले. वृद्धाश्रमातील या सोहळ्याने आजीबाईंना नववर्षाची खरी भेट मिळाली. माहेरची ऊब आणि आपुलकी. आरबीजी फाउंडेशनच्या या उपक्रमाने वृद्धांच्या आयुष्यात आनंदाची लहर निर्माण केली. मधुरा गेठे यांच्या या संवेदनशील पुढाकाराला आजीबाईंच्या आशीर्वादाने आणि समाजाच्या कौतुकाने साथ मिळाली. नववर्षाच्या स्वागतात हा माहेरचा सोहळा खरोखरच अविस्मरणीय ठरला!

महत्वाच्या बातम्या-

-पुण्यात थर्टीफर्स्टचं सेलिब्रेशन: MG-FC रोडवर संध्याकाळी नो एन्ट्री, शहरातील वाहतूकीत मोठे बदल

-अजित पवारांनी दिले गुंडांच्या कुटुंबातच दिले एबी फॉर्म, नव्या राजकीय चर्चेला उधाण

-भाजपने उतरवले युवा नेतृत्व मैदानात, प्रभाग २५ मधून मानकर, बापट, टिळक आणि पंडित यांची उमेदवारी दाखल

-तीन दशके पक्षाशी एकनिष्ठ आता मिळाली संधी, प्रभाग २६ मधून भाजपकडून स्नेहा माळवदे यांचा अर्ज दाखल

-हर्षवर्धन मानकर प्रभाग 11 मधून महापालिकेच्या मैदानात, अर्ज भरताच मांडला विकासाचा अजेंडा