पुणे : महानगरपालिका निवडणुकीच्या पार्श्वभूमीवर उमेदवारी अर्जांची छाननी प्रक्रिया पार पडली असून उद्या अर्ज माघारी घेण्याचा अंतिम दिवस आहे. पुण्यात भाजप आणि उपमुख्यमंत्री एकनाथ शिंदे यांच्या शिवसेनेत युती होईल, अशी चर्चा सुरू असताना शेवटच्या क्षणापर्यंत भाजपकडून निर्णय लांबवल्याने अखेर शिंदे यांच्या नेतृत्वाखालील शिवसेनेने अनेक उमेदवारांना एबी फॉर्म देत स्वतंत्र लढण्याची तयारी दर्शवली आहे. त्यामुळे पुण्यात शिवसेना (शिंदे गट) स्वतंत्र ताकदीने निवडणूक लढवताना दिसत आहे.
निवडणूक जाहीर झाल्यानंतर शिवसेनेत अनेक बड्या नेत्यांचे प्रवेश झाले. त्यामध्ये माजी उपमहापौर आणि सहा वेळा नगरसेवक राहिलेले उल्हास उर्फ आबा बागुल यांचे नाव विशेष लक्षवेधी ठरत आहे. गेल्या तीन ते चार दशकांपासून प्रभाग क्रमांक 36 सहकारनगर – पद्मावती परिसरात विकासाचे सातत्य राखणारा चेहरा म्हणून आबा बागुल संपूर्ण शहरात परिचित आहेत.
गेल्या 30 ते 40 वर्षांच्या राजकीय प्रवासात आबा बागुल यांनी पाणीपुरवठा, रस्ते, ड्रेनेज, उद्याने, सामाजिक सभागृहे, शैक्षणिक सुविधा, आरोग्य सेवा आणि मूलभूत नागरी सोयी-सुविधांवर ठोस काम करून नागरिकांचा विश्वास संपादन केला आहे. काम बोलते या भूमिकेतून त्यांनी कायम राजकारण केले असून त्यामुळेच आजही नागरिकांमध्ये त्यांचे स्थान अबाधित आहे.
प्रभाग क्रमांक 36 सहकारनगर – पद्मावतीमध्ये आबा बागुल यांची प्रमुख लढत भाजप आणि राष्ट्रवादी काँग्रेसच्या उमेदवारांशी असणार आहे. मात्र, नगरसेवक म्हणून केलेला प्रत्यक्ष विकास, जाती-धर्मापलीकडे सर्व समाजघटकांशी असलेले सलोख्याचे संबंध आणि प्रत्येक नागरिकाला आपला वाटणारा सहजस्वभावी चेहरा यामुळे आबा बागुल यांचे पारडे तुलनेने जड दिसत आहे.
या प्रभागात आबा बागुल यांच्या नेतृत्वाखाली शिवसेनेचे संपूर्ण आणि सुसंघटित पॅनल मैदानात उतरले असून त्याचा थेट फायदा शिंदे यांच्या शिवसेनेला होण्याची शक्यता वर्तवली जात आहे. एकीकडे उपमुख्यमंत्री एकनाथ शिंदे यांचे लोकाभिमुख निर्णय, प्रशासनातील कार्यक्षमता आणि विकासाभिमुख भूमिका, तर दुसरीकडे आबा बागुल यांचा अनुभव, कामाचा ठसा आणि स्थानिक पातळीवरील मजबूत पकड या दुहेरी ताकदीमुळे विरोधकांसमोर तगडे आव्हान उभे राहिले आहे.
एकूणच, प्रभाग 36 मध्ये ही निवडणूक केवळ राजकीय समीकरणांची नाही, तर विकास विरुद्ध घोषणाबाजी अशी होण्याची चिन्हे आहेत. या लढतीत विकासाचा विश्वास असलेले आबा बागुल विरोधकांसाठी कठीण परीक्षा ठरत असल्याचे स्पष्टपणे दिसून येत आहे.
महत्वाच्या बातम्या-
-माहेरची साडी अन् आठवणींची ऊब: वृद्धाश्रमातील आजीबाईंना मधुरा गेठेंचा आपुलकीचा स्पर्श!
-पुण्यात थर्टीफर्स्टचं सेलिब्रेशन: MG-FC रोडवर संध्याकाळी नो एन्ट्री, शहरातील वाहतूकीत मोठे बदल
-अजित पवारांनी दिले गुंडांच्या कुटुंबातच दिले एबी फॉर्म, नव्या राजकीय चर्चेला उधाण
-भाजपने उतरवले युवा नेतृत्व मैदानात, प्रभाग २५ मधून मानकर, बापट, टिळक आणि पंडित यांची उमेदवारी दाखल
-तीन दशके पक्षाशी एकनिष्ठ आता मिळाली संधी, प्रभाग २६ मधून भाजपकडून स्नेहा माळवदे यांचा अर्ज दाखल
