पुणे : पुणे शहराच्या मध्यवर्ती भागातील महत्त्वपूर्ण असलेल्या प्रभाग क्रमांक २५ मधून भारतीय जनता पार्टीने युवा नेतृत्वाला संधी देत आपली ताकद दाखवून दिली आहे. भाजपकडून शहर सरचिटणीस राघवेंद्र बापू मानकर, स्वरदा बापट, कुणाल टिळक आणि स्वप्नाली पंडित यांनी आज आपले उमेदवारी अर्ज दाखल केले.
आमदार हेमंत रासने यांच्या प्रमुख उपस्थितीत चारही उमेदवारांचे अर्ज दाखल करण्यात आले. यावेळी भाजपचे पदाधिकारी, कार्यकर्ते तसेच नागरिक मोठ्या संख्येने उपस्थित होते.
यावेळी बोलताना आमदार हेमंत रासने म्हणाले की, “कसबा विधानसभा मतदारसंघ आणि प्रभाग २५ च्या सर्वांगीण विकासासाठी भारतीय जनता पार्टीच्या माध्यमातून सातत्याने कार्य सुरू आहे. पंतप्रधान नरेंद्र मोदी यांच्या नेतृत्वाखालील केंद्र सरकार, मुख्यमंत्री देवेंद्र फडणवीस यांच्या नेतृत्वाखालील राज्य सरकार तसेच पुणे महानगरपालिकेतील सत्ता काळामध्ये भाजपने शहराच्या विकासासाठी भरीव योगदान दिले आहे. या विकासकामांच्या जोरावर प्रभागातील नागरिक भारतीय जनता पार्टीच्या सर्व उमेदवारांना सेवा करण्याची संधी देतील, असा मला ठाम विश्वास आहे.”
महानगरपालिका निवडणुकीसाठी उमेदवारी अर्ज दाखल करण्याची आज शेवटची मुदत असल्याने शहरात राजकीय घडामोडींना वेग आला होता. सर्वच प्रमुख राजकीय पक्षांकडून उमेदवार निश्चित करत अर्ज दाखल करण्यासाठी मोठी धावपळ सुरू असल्याचे चित्र पाहायला मिळाले. यंदा अनेक पक्षांनी अधिकृत उमेदवार यादी जाहीर न करता संभाव्य उमेदवारांना थेट एबी फॉर्म देत उमेदवारी अर्ज दाखल करून घेतल्याचे चित्र पाहायला मिळत आहे. त्यामुळे अनेक प्रभागांमध्ये शेवटच्या क्षणापर्यंत सस्पेन्स कायम आहे.
महत्वाच्या बातम्या-
-तीन दशके पक्षाशी एकनिष्ठ आता मिळाली संधी, प्रभाग २६ मधून भाजपकडून स्नेहा माळवदे यांचा अर्ज दाखल
-हर्षवर्धन मानकर प्रभाग 11 मधून महापालिकेच्या मैदानात, अर्ज भरताच मांडला विकासाचा अजेंडा
-मोहोळांना नडले अन् पालिका निवडणुकीचे सगळेच प्लॅन फसले; भाजप-शिंदे सेना युतीत खेळखंडोबा
-पठारे परिवाराची डबल ढोलकी, लेकाला भाजपमध्ये पाठवलं अन् आमदारांनी मतदारसंघाला ‘तुतारीमुक्त’ केलं
