पुणे : अमेरिका, इस्रायल आणि इराण यांच्यातील युद्धाचा आज सातवा दिवस आहे. दोन्ही बाजूंनी सातत्याने हल्ले सुरू असून पश्चिम आशियातील परिस्थिती अत्यंत तणावपूर्ण आहे. या युद्धात इराणमध्ये सर्वाधिक जीवितहानी झाली असून आतापर्यंत १४०० हून अधिक लोकांचा मृत्यू झाला आहे. युद्ध अधिक भडकल्यास जागतिक तेल पुरवठा साखळी विस्कळीत होऊ शकते, ज्याचा थेट परिणाम कच्च्या तेलाच्या किमतींवर होतो आणि त्याचा फटका भारतासह महाराष्ट्रालाही बसू लागला आहे.
इराण हा जगातील प्रमुख तेल उत्पादक देशांपैकी एक असल्याने युद्धामुळे तेल पुरवठ्यात अडथळे येण्याची भीती व्यक्त केली जात होती. आता ही भीती प्रत्यक्षात उतरली असून, युद्धाच्या झळा महाराष्ट्रापर्यंत पोहोचल्या आहेत. कमर्शियल गॅस पुरवठ्यावर याचा थेट परिणाम दिसू लागला आहे. अनेक गॅस डिलर्सनी ग्राहकांना सूचना दिल्या आहेत की, युद्धजन्य परिस्थितीमुळे कमर्शियल वापराचा गॅस पुरवठा तात्पुरता थांबवण्यात आला आहे.
डिलर्सनी ग्राहकांना स्पष्ट केले आहे की, “प्रिय डिलर्स, युद्धजन्य परिस्थितीमुळे कमर्शियल वापराचा गॅस पुरवठा थांबवण्यात येत आहे. सिलेंडर्स घेऊन जाण्यासाठी पुढील सूचनेपर्यंत कृपया गाड्या पाठवू नका. परिस्थिती सुधारली की लगेच कळवले जाईल.” ही सूचना अनेक व्यावसायिकांना आणि हॉटेल्स, रेस्टॉरंट्स, कॅटर्सना देण्यात आली आहे. परिणामी, व्यावसायिक क्षेत्रात अस्वस्थता निर्माण झाली आहे.
युद्धामुळे आंतरराष्ट्रीय बाजारात कच्च्या तेलाच्या किमतींमध्ये मोठी वाढ होण्याची शक्यता आहे. भारत हा जगातील सर्वात मोठ्या तेल आयातदार देशांपैकी एक असल्याने याचा फटका इंधन दर, वाहतूक खर्च आणि एकूणच महागाईवर पडणार आहे. महाराष्ट्रातील व्यावसायिक आणि सामान्य नागरिकांना आता युद्धाच्या अप्रत्यक्ष परिणामांचा सामना करावा लागत आहे. गॅस पुरवठा थांबल्याने छोटे-मोठे व्यवसाय प्रभावित होत आहेत.
राज्यातील गॅस डिलर्स आणि व्यावसायिक संघटनांनीही या परिस्थितीवर चिंता व्यक्त केली आहे. परिस्थिती सुधारण्याची वाट पाहत असतानाच, पुढील काही दिवसांत किंमती आणि पुरवठ्यातील अस्थिरता वाढण्याची शक्यता आहे. युद्धाच्या झळा आता थेट महाराष्ट्राच्या अर्थव्यवस्थेपर्यंत पोहोचल्या असून, सामान्य नागरिकांना याचा सर्वाधिक फटका बसण्याची भीती व्यक्त केली जात आहे.
महत्वाच्या बातम्या-
-आधी निवडणुकीत पराभूत आता दाखल झाला गुन्हा, वसंत मोरेंच्या अडचणी वाढणार
-स्वीकृतसाठी जोरदार फील्डिंग! गल्लीपासून दिल्लीपर्यंत लॉबिंग सुरू, कुणाला लागणार लॉटरी?
-भाजप नगरसेवक व्यंकोजी खोपडे अडचणीत? सरपंच असताना आर्थिक गैरव्यवहाराचा आरोप; वसंत मोरे आक्रमक
