पुणे : पुणे महापालिका निवडणुकीत १६५ जागांपैकी तब्बल ११९ जागा जिंकून भाजपने स्पष्ट बहुमत मिळवले असतानाच, आता स्वीकृत नगरसेवक पदांसाठी राजकीय वर्तुळात जोरदार चढाओढ सुरू झाली आहे. यापूर्वी पाच स्वीकृत सदस्य नियुक्त केले जात असताना आता राज्य सरकारने कायद्यात बदल करून ही संख्या दुप्पट करून १० केली आहे. त्यामुळे पक्षांतर्गत आणि बाहेरून अनेक कार्यकर्ते या पदासाठी फिल्डिंग लावून बसले आहेत.
निवडणुकीच्या निकालानुसार भाजपला ७, राष्ट्रवादी काँग्रेस (अजित पवार गट)ला २ आणि काँग्रेसला १ असे एकूण दहा स्वीकृत नगरसेवक पदे मिळणार आहेत. महापालिका आयुक्त नवल किशोर राम यांनी सर्व पक्षांच्या गटनेत्यांना स्वीकृत नगरसेवक पदासाठी नावे शिफारस करण्याबाबत पत्र दिले आहे. ही नावे ९ मार्च रोजी सकाळी ११ ते दुपारी २ या वेळेत आयुक्तांकडे सादर करावी लागणार असून, मार्च महिन्याच्या पहिल्या सर्वसाधारण सभेत त्यावर शिक्कामोर्तब होईल.
निवडणुकीपूर्वी सर्वच पक्षांच्या कार्यकर्त्यांनी तिकीट मिळवण्यासाठी प्रचंड प्रयत्न केले होते. मात्र तिकीट वाटपात अनेक जुन्या आणि निष्ठावंत कार्यकर्त्यांवर अन्याय झाल्याची भावना निर्माण झाली. काहींना एबी फॉर्म देऊनही उमेदवारी अचानक काढून घेण्यात आली, तर काहींची उमेदवारी फक्त आमदार-मंत्र्यांच्या नातेवाईक असल्याने नाकारण्यात आली. अनेक ठिकाणी बाहेरून आणलेल्या उमेदवारांमुळे स्थानिक कार्यकर्त्यांचा पत्ता कट झाला.
या नाराज कार्यकर्त्यांची समजूत काढण्यासाठी पक्ष नेत्यांकडून स्वीकृत नगरसेवक पद देण्याचे आश्वासन देण्यात आले आहे. स्वीकृत सदस्यपद मिळाल्यास नगरसेवक म्हणून सर्वत्र मिरविता येते आणि महापालिकेच्या अर्थसंकल्पात काही ठराविक निधी विकास कामांसाठी मिळतो. त्यामुळे इच्छुकांनी थेट वरिष्ठ पातळीवर दबाव आणण्यास सुरुवात केली आहे. भाजपसह राष्ट्रवादी काँग्रेस आणि काँग्रेसमधील अनेक इच्छुक या पदासाठी जोरदार प्रयत्न करत आहेत.
स्वीकृत नगरसेवक पदे डॉक्टर, इंजिनियर, वकील, तज्ज्ञ आणि सामाजिक कार्यकर्त्यांना द्यावीत, असा नियम असला तरी बहुतांश वेळा राजकीय पक्षाशी संबंधित कार्यकर्ते आणि पदाधिकाऱ्यांनाच संधी दिली जाते. या पदांसाठी पक्षांतर्गत समीकरणे महत्त्वाची ठरणार असून, ९ मार्च रोजी नावे सादर झाल्यानंतर मार्चच्या सभेत या नियुक्त्यांना अंतिम स्वरूप मिळेल. महापालिकेत भाजपच्या बहुमतामुळे या पदांचा राजकीय महत्त्व अधिक वाढला आहे.
महत्वाच्या बातम्या-
-भाजप नगरसेवक व्यंकोजी खोपडे अडचणीत? सरपंच असताना आर्थिक गैरव्यवहाराचा आरोप; वसंत मोरे आक्रमक
-पुणे महापालिकेत स्वीकृत नगरसेवक कोण होणार? मुहूर्त ठरला अन् इच्छुकांची जोरदार लॉबिंग सुरू
-‘आयुक्त साहेब, माझ्या मानहानीचा खुलासा करा’ राज्यमंत्री माधुरी मिसाळ आक्रमक, सुनावले खडेबोल
