पुणे : पुण्यातील माजी नगरसेवक वसंत मोरे यांच्यावर अनुसूचित जाती-जमाती (अत्याचार प्रतिबंधक) कायद्यांतर्गत गुन्हा दाखल करण्यात आला आहे. हा गुन्हा शिवाजीनगर पोलीस ठाण्यात विश्वनाथ तुकाराम लहाडे (वय ७२) यांच्या तक्रारीवरून नोंदवण्यात आला आहे. २५ फेब्रुवारी रोजी वसंत मोरे यांनी घेतलेल्या पत्रकार परिषदेतील काही वक्तव्ये हे अपमानास्पद असल्याचा आरोप तक्रारीत करण्यात आला आहे.
फिर्यादी विश्वनाथ लहाडे यांच्या म्हणण्यानुसार, वसंत मोरे यांना आपण अनुसूचित जातीचे असल्याची पूर्ण माहिती असतानाही त्यांनी जाणीवपूर्वक आणि हेतूपूर्वक अपमानास्पद वक्तव्य केले. पत्रकार परिषदेत मोरे यांनी ‘लहाडे इतका दारू पिला होता की त्याला बोलताही येत नव्हते, ओढ्यामध्ये उतरून गटारे साफ करत आहे’ असे म्हटले. हे वक्तव्य सोशल मीडियावर व्हायरल झाल्याने फिर्यादींची सामाजिक बदनामी झाली असून, कुटुंबीयांवर मोठा मानसिक ताण आला आहे.
तक्रारीत म्हटले आहे की, या व्हायरल व्हिडिओमुळे कुटुंबीय भीतीच्या आणि तणावाच्या वातावरणात राहत आहेत. वसंत मोरे यांनी हे वक्तव्य जाणीवपूर्वक केल्याने अनुसूचित जातीच्या व्यक्तीच्या प्रतिष्ठेला धक्का पोहोचला असून, त्यामुळे समाजातील त्यांच्या स्थानावर परिणाम झाला आहे. फिर्यादींनी या प्रकरणाची गांभीर्याने दखल घेण्याची मागणी केली होती.
शिवाजीनगर पोलिसांनी तक्रारीची दखल घेत वसंत मोरे यांच्याविरुद्ध ॲट्रॉसिटी कायद्यांतर्गत गुन्हा दाखल केला आहे. या प्रकरणाचा सखोल तपास सुरू असून, पोलिसांनी संबंधित व्हिडिओ आणि पत्रकार परिषदेच्या इतर पुराव्यांचा अभ्यास सुरू केला आहे. पुढील तपासात मोरे यांचे वक्तव्य हेतूपूर्ण होते की नाही, याची चौकशी केली जाणार आहे. या घटनेने पुण्यातील राजकीय वर्तुळात खळबळ उडाली असून, अनुसूचित जाती-जमातींवरील अत्याचार आणि अपमानास्पद वक्तव्यांच्या मुद्द्यावर पुन्हा चर्चा सुरू झाली आहे. पोलिसांनी या प्रकरणाचा निष्पक्ष तपास करून लवकरच आरोपपत्र दाखल करावे, अशी अपेक्षा व्यक्त होत आहे.
महत्वाच्या बातम्या-
-स्वीकृतसाठी जोरदार फील्डिंग! गल्लीपासून दिल्लीपर्यंत लॉबिंग सुरू, कुणाला लागणार लॉटरी?
-भाजप नगरसेवक व्यंकोजी खोपडे अडचणीत? सरपंच असताना आर्थिक गैरव्यवहाराचा आरोप; वसंत मोरे आक्रमक
-पुणे महापालिकेत स्वीकृत नगरसेवक कोण होणार? मुहूर्त ठरला अन् इच्छुकांची जोरदार लॉबिंग सुरू
