पुणे : पुण्यातील फरासखाना पोलिस ठाण्यात घडलेल्या एका अतिशय संतापजनक आणि धक्कादायक घटनेमुळे पोलिस दलाच्या कार्यपद्धतीवर गंभीर प्रश्नचिन्ह उपस्थित झाले आहे. मदतीसाठी स्वतः पोलिस ठाण्यात आलेल्या एका बांगलादेशी तरुणीला पुन्हा जबरदस्तीने वेश्याव्यवसाय करवून घेणाऱ्या कुंटणखाना मालकिणीच्या ताब्यात देण्यात आल्याचा गंभीर आरोप महिला पोलिस कर्मचाऱ्यावर ठेवण्यात आला आहे. या प्रकरणी संबंधित महिला पोलिस हवालदाराला निलंबित करण्यात आले आहे.
सुमारे महिनाभरापूर्वी रात्रीच्या वेळी ही तरुणी फरासखाना पोलिस ठाण्यात आली होती. तिने कर्तव्यावर असलेल्या महिला पोलिस हवालदाराला आपण बांगलादेशी नागरिक असून बुधवार पेठ परिसरात जबरदस्तीने वेश्याव्यवसाय करून घेतला जात असल्याची माहिती दिली. तसेच आपली सुटका करून मदत करण्याची विनंतीही तिने केली. मात्र, मदत करण्याऐवजी संबंधित महिला पोलिस हवालदाराने त्या तरुणीला बुधवार पेठेतील शुक्रवार पेठ पोलिस चौकीत नेले.
तेथे ती तरुणी ज्या कुंटणखान्यात काम करत होती, त्या कुंटणखाना मालकिणीला बोलावण्यात आले. महिला पोलिस कर्मचारी आणि कुंटणखाना मालकिणीमध्ये काही संशयास्पद बोलणी झाल्याचा आरोप आहे. या चर्चेनंतर मदतीची अपेक्षा ठेवून पोलिसांकडे आलेल्या तरुणीला पुन्हा त्या कुंटणखाना मालकिणीच्या ताब्यात देण्यात आल्याचे समोर आले आहे. हा प्रकार उघडकीस आल्यानंतर पोलिस विभागात खळबळ उडाली.
या प्रकरणाची चौकशी करण्यात आली असता कर्तव्यात गंभीर हलगर्जीपणा आणि बेजबाबदारपणा झाल्याचे निष्पन्न झाले. परिमंडळ एकचे पोलिस उपायुक्त कृषिकेश रावले यांनी या प्रकरणाची दखल घेत फरासखाना पोलिस ठाण्यात तपास पथकात नेमणुकीस असलेल्या महिला पोलिस हवालदार मनिषा पुकाळे यांना निलंबित करण्याचे आदेश दिले आहेत. “अत्यंत बेजबाबदारपणे कर्तव्य बजावून शिस्तप्रिय पोलिस दलाची प्रतिमा जनमानसात मलिन केल्याचा ठपका ठेवत निलंबनाची कारवाई करण्यात आली,” असे आदेशात नमूद करण्यात आले आहे.
या घटनेने पुणे पोलिस दलाच्या कार्यपद्धतीवर गंभीर प्रश्नचिन्ह उपस्थित झाले आहे. अशा प्रकारच्या घटना थांबवण्यासाठी पोलिस दलाने तात्काळ कठोर कारवाई आणि आंतरिक चौकशी सुरू केली असून, भविष्यात अशा घटनांची पुनरावृत्ती होऊ नये यासाठी विशेष सूचना देण्यात आल्या आहेत. या प्रकरणाचा सखोल तपास सुरू असून, तरुणीच्या सुरक्षिततेसाठीही पोलिसांनी आवश्यक ती पावले उचलली आहेत.
महत्वाच्या बातम्या-
-महिला नगरसेवक फक्त नामधारी, पती अन् लेकच बनले कारभारी; धायरीतल्या ‘भिडू’ची गोष्टच न्यारी
-‘एन. ए.’ परवानगी इतिहासजमा, जिल्हाधिकाऱ्यांच्या स्वतंत्र परवानगीची संपली गरज
-निवडणुकीत घेतली पक्षविरोधी भूमिका, आता भाजपने दाखवला घरचा रस्ता; पुण्यात ६९ जणांचे निलंबन
-बुधवार पेठेत मध्यरात्री पोलिसांचे कोम्बिंग ऑपरेशन: कुंटणखान्यांची कसून झडती, ५० घरांची तपासणी!
-पुरंदर विमानतळ प्रकल्पाला राज्य शासनाची मान्यता; पुणे-पश्चिम महाराष्ट्राच्या विकासाला गती मिळेल
