पुणे : सांस्कृतिक व ऐतिहासिक वारसा लाभलेल्या कसबा–भवानी पेठ क्षेत्रीय कार्यालयाच्या हद्दीत शंभर टक्के कचरा संकलन करण्याच्या उद्देशाने पुणे महानगरपालिका आणि स्वच्छ पुणे सेवा सहकारी संस्थेच्या संयुक्त विद्यमाने शहरात पहिल्यांदाच राबवण्यात येणाऱ्या “झिरो वेस्ट कसबा–भवानी” या महत्वाकांक्षी प्रकल्पाचा आज शुभारंभ करण्यात आला. या प्रकल्पाअंतर्गत प्रत्येक घरातून संपूर्ण कचरा संकलनावर भर देण्यात येणार असून विशेषतः कमी उत्पन्न असलेल्या भागात आठवड्याचे सातही दिवस ही सेवा उपलब्ध असणार आहे.
कसबा मतदारसंघाचे आमदार हेमंत रासने, पुणे महापालिका आयुक्त नवल किशोर राम आणि अतिरिक्त आयुक्त पवनीत कौर यांच्या प्रमुख उपस्थितीत या उपक्रमाचा प्रारंभ झाला. ‘स्वच्छ, सुंदर आणि विकसित कसबा’ या अभियानाला या झिरो वेस्ट प्रकल्पाची जोड देण्यात आली आहे. यामध्ये लक्ष्मी रोड परिसरातील दुकाने व पथारी व्यावसायिकांकडून संध्याकाळी कचरा संकलन करण्यात येणार आहे.
यावेळी आमदार हेमंत रासने म्हणाले की, गेल्या वर्षभरापासून कसबा मतदारसंघात स्वच्छता व सुशोभीकरणाचे अभियान राबवले जात असून त्याचा सकारात्मक परिणाम दिसू लागला आहे. बहुतांश फिडर पॉईंट व क्रॉनिक स्पॉट बंद करण्यात आले असून आता महापालिकेच्या झिरो वेस्ट प्रकल्पामुळे स्वच्छतेला आणखी गती मिळणार आहे. सुमारे ४०० कचरावेचक वाढवण्यात येणार असल्याने घराघरातून कचरा संकलन अधिक प्रभावी होईल, असा विश्वास त्यांनी व्यक्त केला.
आयुक्त नवल किशोर राम यांनी सांगितले की, डिसेंबर २०२६ पर्यंत पुणे शहर स्वच्छ व सुंदर करण्याचे महापालिकेचे ठोस ध्येय आहे. पुढील ९० दिवसांत कसब्यात पायलट प्रोजेक्ट राबवण्यासाठी स्वच्छ संस्थेला मनुष्यबळ वाढीसाठी १ कोटी रुपयांची मदत देण्यात आली आहे. हा प्रयोग यशस्वी झाल्यानंतर तो संपूर्ण शहरात राबवण्यात येणार आहे.
यावेळी घनकचरा व्यवस्थापन विभागाचे उपायुक्त श्री. अविनाश सकपाळ, मंडल अध्यक्ष अमित कंक, छगन बुलाखे, प्रशांत सुर्वे, समन्वयक राजेंद्र काकडे, नगरसेवक अजय खेडेकर, विशाल धनवडे, देवेंद्र वडके, राघवेंद्र मानकर, कुणाल टिळक, अमर आवळे, स्वरदाताई बापट, ऐश्वर्याताई थोरात, पल्लवीताई जावळे, कल्पनाताई बहिरट, उज्वलाताई यादव, स्नेहाताई माळवदे, स्वच्छ संस्थेच्या अध्यक्षा सुमनताई मोरे, बोर्ड मेंबर विद्याताई नाईकनवरे, संस्थेच्या मुख्य कार्यकारी अधिकारी लुब्नाजी अनंतकृष्णन यांच्यासह मतदारसंघातील सर्व माजी नगरसेवक, पदाधिकारी, कार्यकर्ते व स्वच्छ संस्था कचरावेचक कर्मचारी मोठ्या संख्येने उपस्थित होते.
महत्वाच्या बातम्या-
-चारही बाजूने टीका झाली पालिकेला आली जाग, वर्धापन दिनाचे सगळे कार्यक्रम केले रद्द
-पुणे शहर परिवर्तन कक्षाची बैठक: पुण्याच्या विकासासाठी समन्वयाची नवी सुरुवात, महत्त्वाचे निर्णय!
-सोमेश्वरवाडीत महाशिवरात्रीची तयारी; सोमेश्वर मंदिर परिसरात विशेष स्वच्छता अभियानाचे आयोजन
-फेसबुकवर प्रेम अन् ऑनलाइन गेमिंगसाठी फसवणूक तरुणाची ९२ हजारांची लूट, मुख्य आरोपी अटकेत
