पुणे : वडगाव खुर्द येथील रेडी मिक्स काँक्रीट (आरएमसी) प्रकल्पांवर शुक्रवारी पहाटे नियोजित केलेली महापालिकेची कारवाई गुरुवारी रात्री उशीरा अचानक रद्द करण्यात आली आहे. नागरिकांच्या आरोग्य आणि पर्यावरणाच्या रक्षणासाठी सुरू केलेल्या या मोहिमेला एका आमदाराच्या दबावामुळे खीळ बसल्याचे सूत्रांनी सांगितले.
बुधवारी लोहगाव-खांदवे नगर परिसरातील ७ आरएमसी प्रकल्प जमीनदोस्त करण्यात आले. या कारवाईदरम्यान भाजप नगरसेविकेच्या पतीने अडकाठी आणल्याचा आरोप करत महापालिका प्रशासनाने त्यांच्याविरुद्ध पोलिसांत तक्रार दाखल केली होती. त्यानंतर वडगाव खुर्द, धायरी, बावधन, उंड्री-शेवाळवाडी या भागातील आरएमसी प्रकल्पांवर कारवाई करण्याचे नियोजन करण्यात आले होते.
मात्र, वडगाव खुर्द येथील एक आरएमसी प्रकल्प शहरातील एका आमदाराच्या नातेवाईकाचा असल्याचे समोर आले. या आमदाराने राजकीय दबाव आणल्याने प्रशासनाने पहाटेची नियोजित कारवाई रद्द केली. यामुळे महापालिका प्रशासन आमदारांच्या दबावापुढे झुकल्याचे स्पष्ट झाले आहे.
नागरिकांच्या आरोग्याला धोका निर्माण करणारे अनधिकृत आरएमसी प्रकल्प बंद करण्यासाठी महापालिका प्रशासन किती गंभीर आहे, यावर आता मोठा प्रश्नचिन्ह उभा राहिला आहे. आमदाराच्या नातेवाईकासाठी सर्वसामान्य नागरिकांचे आरोग्य धोक्यात घालवले जाणार का, असा संतप्त सवाल उपस्थित होत आहे.
महत्वाच्या बातम्या-
-पुण्यात उष्णतेचा तडाखा! ४२ अंशांवर पोहोचले तापमान, पुढील ४ दिवस सावध राहा
-पुण्यात अनधिकृत होर्डिंगवर चालणार हातोडा, पण किती होर्डिंग अनधिकृत? महापालिकेकडे आकडाच नाही
-शेतकऱ्यांसाठी दिलासादायक निर्णय! ‘हवेली सभापतींचा ‘बळीराजा’ मॉडेल राज्यभर राबविणार’
-पुण्यावर पाणीकपातीची टांगती तलवार; खासदार, मंत्री, आमदार कुणीच बोलत नाही, आश्वासनाचं काय?
