पुणे : उपमुख्यमंत्री अजित पवार यांनी महाराष्ट्र ऑलिम्पिक असोसिएशनच्या (MOA) सध्याच्या कार्यकारिणीवर केंद्रीय राज्यमंत्री मुरलीधर मोहोळ आणि आमदार संदीप जोशी यांनी केलेले सर्व आरोप फेटाळले आहेत. २०१३ पासून आपण असोसिएशनचे अध्यक्ष म्हणून जबाबदारी सांभाळत असल्याचे सांगताना त्यांनी खेळाडूंच्या हितासाठी आणि राज्याच्या क्रीडा क्षेत्राच्या प्रगतीसाठी केलेल्या कामगिरीचा पुनरुच्चार केला.
अजित पवार म्हणाले की, आम्ही कार्यभार घेण्याआधी राष्ट्रीय क्रीडा स्पर्धांमध्ये महाराष्ट्र राज्य सातव्या-आठव्या क्रमांकावरून सलग तीन वेळा प्रथम क्रमांक मिळवला आहे. केंद्रीय गृहमंत्री अमित शहा यांच्या उपस्थितीत खेळाडू आणि पदाधिकाऱ्यांचा सत्कारही झाला. प्रदीप गंधे, संजय शेटे, स्मिता शिरोळे, नामदेव शिरगावकर, धनंजय भोसले यांसारख्या पदाधिकाऱ्यांच्या मार्गदर्शनामुळे आणि खेळाडूंच्या मेहनतीमुळे हे यश मिळाले. मात्र, निवडणुकांच्या पार्श्वभूमीवर काही राजकीय व्यक्ती एका विशिष्ट व्यक्तीला लक्ष्य करून राजकीय हेतूने आरोप करत असल्याचा दावा अजित पवारांनी केला.
कोणत्याही खेळाडूकडून असोसिएशनच्या कामगिरीबाबत तक्रार नसल्याचे पवार यांनी स्पष्ट केले. महाराष्ट्राच्या क्रीडा संस्कृतीला असे आरोप शोभत नाहीत, असे मत त्यांनी व्यक्त केले. क्रीडा संघटनांच्या निवडणुकांमध्ये राजकारण टाळण्यासाठी आतापर्यंत मौन बाळगले होते, परंतु आता पत्रकार परिषदेत आरोप होत असल्याने उत्तर देणे आवश्यक झाल्याचे त्यांनी सांगितले.
या प्रकरणामुळे राज्याच्या क्रीडा क्षेत्रातील राजकारण पुन्हा चर्चेत आले आहे. असोसिएशनच्या आगामी निवडणुकांवर या वादाचा परिणाम होणार का, याकडे सर्वांचे लक्ष लागले आहे.
महत्वाच्या बातम्या-
-‘मला आई बनवा अन् २५ लाख रुपये मिळवा!’ कॉन्ट्रॅक्टरने जाहिरात वाचली अन्…
-गुंड घायवळचे मराठवाड्यातील पवनचक्की माफियांशी संबंध, अन् करोडो रुपयांचे व्यवहार
-पुण्याची वाहतूक कोंडी रोखण्यासाठी निर्णय; रिक्षा परवान्यांवर निर्बंधाची शिफारस
