पुणे : या जगात आजही माणुसकी शिल्लक आहे. याचं उत्तम उदाहरण पुण्यात पहायला मिळालं. सदाशिव पेठेतील कचरा गोळा करणाऱ्या महिलेला पैशांची बॅग सापडली. त्यांनी त्या बॅगेचे मालक शोधले आणि पैशांची बॅग परत केली. सदाशिव पेठेतील २० नोव्हेंबरला सकाळी स्वच्छ संस्थेच्या कचरावेचक अंजू माने या नेहमीप्रमाणे घराघरातून कचरा गोळा करत होत्या. फीडर पॉइंटकडे जाताना रस्त्याच्या कडेला एक बॅग पडलेली दिसली. यापूर्वी औषधांच्या बॅगा मिळाल्याचा अनुभव असल्याने तीही तशीच कोणाची तरी असेल या विचाराने त्यांनी ती सुरक्षित ठेवली. पण बॅग उघडताच त्यात औषधांसह दहा लाख रुपये रोख रक्कम असल्याचे लक्षात आले.
गेली २० वर्षे हाच परिसर सांभाळणाऱ्या अंजू ताईंनी घाबरायचे सोडाच, उलट बॅगेचा मालक शोधण्याचा प्रयत्न सुरू केला. ओळखीच्या नागरिकांच्या मदतीने परिसरात चौकशी केली. याचवेळी एकजण अतिशय घाबरलेल्या अवस्थेत काहीतरी शोधत फिरताना दिसले. अंजू ताईंनी त्यांना बोलावले, पाणी दिले, शांत केले आणि बॅग त्यांचीच असल्याची खात्री करून दहा लाख रुपये जसेच्या तसे परत केले.
बॅगेच्या मालकाने आणि परिसरातील नागरिकांनी अंजू ताईंच्या प्रामाणिकपणाचे भरभरून कौतुक केले. साडी आणि काही रोख रक्कम देऊन त्यांचा सत्कार केला. “हे पैसे माझे नव्हते, म्हणून परत करणं हे माझं कर्तव्य होतं,” असे त्या म्हणाल्या.
हा प्रसंग पुन्हा एकदा सिद्ध करतो की, स्वच्छच्या दारोदार कचरा संकलन सेवेमुळे गेल्या दोन दशकांत कचरावेचक आणि पुणेकर यांच्यात विश्वासाची नाती घट्ट झाली आहेत. ४० लाख पुणेकरांना सेवा देणाऱ्या ४००० स्वच्छ कचरावेचकांमधला हाच प्रामाणिकपणा त्यांना नागरिकांच्या मनात खऱ्या अर्थाने “घर” करून देतो!
घरोघरी कचरा गोळा करणाऱ्या स्वच्छता दूत अंजू माने यांनी रस्त्यावर सापडलेली दहा लाखांची रोख रक्कम असलेली बॅग कोणताही स्वार्थ न ठेवता मूळ मालकाकडे परत केली. त्यांच्या या कृतीने प्रामाणिकतेचं प्रेरणादायी उदाहरण निर्माण केलं आहे. अंजू माने यांच्या या प्रामाणिकतेबद्दल आमदार हेमंत रासने यांनी पेढे भरवून आणि भेटवस्तू देत त्यांचा सन्मान केला. तसेच “स्वच्छ, सुंदर, विकसित कसबा” अभियानाला नवी दिशा देत, अंजू माने यांना ‘स्वच्छ, सुंदर, विकसित आणि प्रामाणिक कसबा’ या अभियानाच्या ब्रँड अॅम्बेसिडर म्हणून घोषित केले आहे.
महत्वाच्या बातम्या-
-पुण्यात नगरसेवक पदासाठी उमेदवारांचा थेट लिलाव; लावली १ कोटी ३ लाखांची बोली!
-लोणावळ्यात भाजप चक्रव्यूहात, काकांचा पुतण्याला बिनशर्त पाठिंबा, सुनील शेळकेंची घोषणा
-यंदा स्वस्तात घराचं स्वप्न साकारण्याची शेवटची संधी, म्हाडानं दिली अर्जासाठी मुदतवाद
-‘नवले पूल परिसरातील अपघात रोखण्यासाठी तातडीने उपाययोजना करा’ केंद्रीय मंत्री नितीन गडकरींचे आदेश
-पुणे महानगरपालिका निवडणुकीसाठी प्रसिद्ध झाली मतदार यादी, तुमचे नाव आहे का? चेक करा
